ՀՀ գլխավոր դատախազի տեղակալ, ՀՀ գլխավոր դատախազությունում ստեղծված աշխատանքային խմբի ղեկավար Հայկ Ասլանյանն ընդունել է ապրիլի 2-ի խորհրդարանական ընտրություններին դիտորդական առաքելություն իրականացնելու նպատակով Հայաստան ժամանած ԱՊՀ դիտորդական խմբի ղեկավարի տեղակալ պարոն Եվգենի Սլաբադային:
Հանդիպմանն անդրադարձ է կատարվել խորհրդարանական ընտրությունների կազմակերպման ու անցկացման խնդիրներին, ինչպես նաև Ընտրական օրենսգրքով ամրագրված փոփոխություններին:
ՀՀ գլխավոր դատախազի տեղակալ Հայկ Ասլանյանը, կարևորելով ԱՊՀ դիտորդների կողմից իրականացվող դիտորդական առաքելությունների դերը, վստահեցրել է, որ դատախազությունն իր լիազորությունների շրջանակում, կանի ամեն ինչ, որպեսզի առաջիկա ընտրությունները անցկացվեն օրենքի շրջանակում և միջազգային նորմերին համապատսխան:
ԱՊՀ դիտորդական խմբի ղեկավարի տեղակալը ներկայացրել է իրենց դիտորդական առաքելության իրականացման ընթացքը, նշել , որ արդեն այցելել են Հայաստանի մի շարք մարզեր՝ տեղում ծանոթանալու բուն քվեարկության գործընթացին:
ԱՊՀ դիտորդը, կարևորելով մամուլի ազատությունը մեր երկրում, նշել է, որ նախնական դիտարկումներով նախընտրական քարոզարշավը անցնում է օրենքի տառին համապատասխան:
Հանդիպմանը ներկա ՀՀ գլխավոր դատախազության ՀԿԳ վարչության պետի տեղակալ, աշխատանքային խմբի անդամ Սևակ Հովհաննիսյանը, ներկայացրել է ընտրական իրավախախտումների վերաբերյալ մամուլի եւ զանգվածային լրատվության մյուս միջոցների հրապարակումները, քաղաքացիների հաղորդումները եւ ՀՀ գլխավոր դատախազության թեժ գծով ստացված ահազանգերը ուսումնասիրելու նպատակով դատախազությունում ստեղծված աշխատանքային խմբի՝ մինչ այժմ իրականացրած աշխատանքները:
