ՀՀ գլխավոր դատախազ Գևորգ Կոստանյանն ընդունել է Սահմանադրական բարեփոխումների հանրաքվեի գործընթացի գնահատման համար Հայաստանում գտնվող ԵԱՀԿ/ ԺՀՄԻԳ դիտորդական առաքելության փորձագետների խմբի ղեկավար Դուգլաս Ուեյքին և իրավական հարցերով փորձագետ Վասիլ Վաշչանկային:
Հանդիպման ընթացքում քննարկվել են ընտրախախտումների վերաբերյալ ահազանգերի առընչությամբ դատախազության իրականացրած գործողություններին և համապատասխան աշխատանքային խմբի կողմից իրավապահ մարմինների գործունեության նկատմամբ պատշաճ դատախազական հսկողությանն առնչվող հարցեր:
ՀՀ Գլխավոր դատախազը նշել է, որ դատախազության կողմից 10.12.2015թ-ի դրությամբ ուսումնասիրվել է 459 ահազանգ, որոնց մի մասն ուղարկվել է ոստիկանություն, մի մասն էլ քննչական մարմիններ` նյութեր նախապատրաստելու համար: Գործընթացը դեռ շարունակվում է:
Աշխատանքային խմբի ղեկավար ՀՀ գլխավոր դատախազության ՀԿԳ քննության վարչության պետ Վ. Մուրադյանը ներկայացրել է ստացած ահազանգերի առավել բնորոշ բնութագրումը, արդեն իսկ հարուցված քրեական գործերը և աշխատանքի կազմակերպման ընդհանուր մեխանիզմը, նշելով, որ գրավոր և փաստարկված դիմումներից բացի ՀՀ իրավապահ մարմինների կողմից ուսումնասիրվում են նաև մամուլի բոլոր հրապարակումները` շատ հաճախ նաև նրանք, որոնք հրապարակված են քաղաքացիների անձնական էջերում: Առերևույթ հանցագործության հատկանիշներ պարունակող ահազանգերը պարտադիր ստանում են իրավական ընթացք:
Գլխավոր դատախազը շեշտել է, որ այս բոլոր քրեական գործերը հարուցվել են հանրաքվեից անմիջապես հետո:
ԵԱՀԿ/ԺՀՄԻԳ դիտորդական առաքելության ղեկավարը բարձր է գնահատել հանրաքվեի հետ կապված ընտրախախտումները բացահայտելու ուղղությամբ ՀՀ դատախազության գործունեությունը` միաժամանակ կարևորելով արդյունավետ քննության իրականացումը:
Հեղինակային իրավունքները պաշտպանված են © 2005-2023
Հրապարակված փաստաթղթերը պաշտոնապես կարող են օգտագործվել միայն ՀՀ գլխավոր դատախազության կողմից հաստատվելուց հետո:
Պաշտոնական էլ.փոստ 10024622@e-citizen.am
(միայն www.e-citizen.am համակարգով ծանուցումների համար)